◀️ ▶️
శ్రీ భ్రమరాంబికాష్టకమ్
ప్రవిమలంబుగమమ్ము నేలిన భక్తజన చింతామణి
అవని జనులకు కొంగుబంగారైన దైవశిఖామణి
శివుని పట్టపురాణి, గుణమణి శ్రీగిరి భ్రమరాంబిక ౹౹
కలియుగంబున మానవులకును కల్పతరువై యుండవా
వెలయు శ్రీగిరిశిఖరమందున విభవమై విలసిల్లవా
ఆలసింపక భక్తవరులకు అష్టసంపద లీయవా
జిలుగు కుంకుమ కాంతి రేఖల శ్రీ గిరీ భ్రమరాంబికా ౹౹
అంగ వంగ కళింగ కాశ్మిరాంధ్ర దేశములందునన్
పొంగుచును వరహాల కొంకణ భూములయందునన్
రంగుగా కర్ణాట మగధ మరాట దేశములందునన్
శృంఖలా దేశముల వెలిసిన శ్రీగిరీ భ్రమరాంబికా ౹౹
అక్షయంబుగ కాశిలోపల అన్నపూర్ణ భావానివై
సాక్షిగణపతి కన్నతల్లివి సద్గుణావతి శాంభవీ
మోక్షమొసగెడు కనకదుర్గపు మూలకారణశక్తివీ
శిక్షజేతువు ఘోరభవముల శ్రీగిరీ భ్రమరాంబికా ౹౹
ఉగ్రలోచన వరవధూమణి యొప్పుగల్గిన భామినీ
విగ్రహంబుల కెల్ల ఘనమై వెలయు శోభన కారిణి
అగ్రపీఠమునందు వెలసిన ఆగమార్థ విచారిణీ
శీఘ్రమే కని వరము లిత్తువు శ్రీగిరీ భ్రమరాంబికా ౹౹
నిగమగోచర నీలకుండలి నిర్మలాంగి నిరంజనీ
మిగులు చక్కని పుష్పకోమలి మిననేత్ర దయానిధీ
జగతిలోన ప్రసిద్ధికెక్కిన చంద్రముఖి సీమంతినీ
చిగురుటాకులవంటి పెదవుల శ్రీగిరీ భ్రమరాంబికా ౹౹
సోమశేఖర పల్లవాధరి సుందరీమణి ధీమణి
కోమలాంగి కృపాపయోనిధీ కుటిలకుంతల యోగినీ
నామనంబును బాయకుండుము నగకులేశుని నందినీ
సీమలోన ప్రసిద్ధికెక్కిన శ్రీగిరీ భ్రమరాంబికా ౹౹
భూతనాధుని వామభాగము పొందుగా చేకొంటివి
ఖ్యాతిగను శ్రీశైలమందు ప్రకాశముగ నెలకొంటివి
పాతకంబులు బారద్రోలుచు భక్తులను చేకొంటివి
శ్వేతగిరిపైనుండి వెలసిన శ్రీగిరీ భ్రమరాంబికా ౹౹
తరుణి శ్రీగిరి మల్లికార్జున దైవరాయని భామినీ
కరుణతో మమ్మేలు మెప్పుడు కల్పవృక్షము భంగిని
వరుసతో నీయష్టకంబును రాసి చదివిన వారికిన్
సిరుల నిచ్చెద వెల్లకాలము శ్రీగిరీ భ్రమరాంబికా ౹౹
